നീണ്ട യുആർഎൽ അഥവാ ഇന്റർനെറ്റ് വിലാസങ്ങൾ ചുരുക്കുന്നതിനായി ഉപയോഗിക്കുന്ന സേവനമാണ് ' യുആർഎൽ ഷോർട്നർ'. വെബ് സൈറ്റുകളുടെ വിലാസം ഉൾക്കൊള്ളുന്ന യൂണിഫോം റിസോഴ്സ് ലൊക്കേറ്റർ അഥവാ യുആർഎൽ നീളം കുറഞ്ഞ മറ്റൊരു യുആർഎൽ ആക്കി മാറ്റുക എന്നതാണ് ഈ സേവനം കൊണ്ട് ഉദ്ദേശിക്കുന്നത്. ഏറെ നീണ്ട പേരുള്ള ഒരാളെ ചെല്ലപ്പേര് ഉപയോഗിച്ച് വിളിക്കും പോലെ ചെറുതാക്കിയ യുആർഎൽ യഥാർഥ പേജിലേക്ക് തന്നെ നമ്മെ എത്തിക്കും.
Tinyurl പോലുള്ള യുആർഎൽ ചുരുക്കൽ സേവനങ്ങൾ വ്യാപകമായി ഇന്ന് ഉപയോഗിച്ചു വരുന്നു. പല ഓൺലൈൻ വാർത്താ പോർട്ടലുകളും തങ്ങളുടെ വാർത്തകളുടെ ലിങ്കുകൾ വിവിധ ഫെയ്സ്ബുക്ക് ഗ്രൂപ്പുകളിലേക്ക് ഒരേസമയം ഷെയർ ചെയ്യാൻ ഷോർട്ട് യുആർഎൽ സേവനം ഉപയോഗിച്ചു വരുന്നുണ്ട്. ഒരേ ലിങ്ക് തന്നെ ഒന്നിലധികം സ്ഥലങ്ങളിൽ ഉപയോഗിക്കുമ്പോൾ സ്പാം എന്ന രീതിയിൽ പരിഗണിക്കപ്പെടാനുള്ള സാധ്യത ഒഴിവാക്കാനാണ് ഇവർ ഈ പൊടിക്കൈ പ്രയോഗിക്കുന്നത്.
കാഴ്ചയിൽ അരോചകമായി തോന്നുന്ന വലിയ ലിങ്ക് അഡ്രസുകൾ ചുരുക്കി ലളിതമാക്കാൻ ഈ സേവനം സഹായിക്കും എന്നത് പോലെ തന്നെ ഇത് ഉപദ്രവകാരികളാണെന്നാണ് പുതിയ പഠനങ്ങൾ വ്യക്തമാക്കുന്നത്. ചെറുതാക്കിയ യുആർഎൽ വഴി ഹാക്കർമാർക്ക് നിങ്ങളുടെ പേഴ്സണൽ കംപ്യൂട്ടറിലേക്ക് നുഴഞ്ഞു കയാറാനും വിവരങ്ങൾ ശേഖരിക്കാനും സാധിക്കും, നിങ്ങളുടെ ക്ലൗഡ് സ്റ്റോറേജുകളിൽ മാൽവെയറുകൾ പരത്താനും ഈ സേവനത്തിന്റെ മറ പറ്റി കംപ്യൂട്ടർ നുഴഞ്ഞു കയറ്റക്കാർക്ക് സാധിക്കും.
പഠനത്തിന്റെ ഭാഗമായി നടത്തിയ പരീക്ഷണങ്ങളിൽ ഷോർട്ട് യുആർഎൽ വഴി ഷെയർ ചെയ്ത ഗൂഗിൾ ഡ്രൈവ്, വൺ ഡ്രൈവ് എന്നിവയിലെ ഉള്ളടക്കങ്ങൾ ഇത്തരത്തിലെ ഹാക്കിങ് രീതിയിലൂടെ ചോർത്തിയെടുക്കാനും അവ നശിപ്പിക്കാനോ മാറ്റങ്ങൾ വരുത്താനോ സാധിക്കുക്കുമെന്ന് വ്യക്തമായി. മൈക്രോസോഫ്റ്റിന്റെ വൺ ഡ്രൈവ് ക്ലൗഡ് സ്റ്റോറേജിലെ വ്യക്തിഗത വിവരങ്ങൾ ശേഖരിക്കാൻ ഷോർട്ട് യുആർഎൽ വഴി എത്തിക്കൽ ഹാക്കറൻമാർക്ക് സാധ്യമായി.
goo.gl, bit.ly എന്നിവ ചില പ്രമുഖ യുആർഎൽ ചുരുക്കൽ സേവനദാതാക്കളാണ്. ഇതിൽ goo.gl ഗൂഗിൾ നൽകുന്ന യുആർഎൽ ഷോർട്ട്നിംഗ് സേവനമാണ്. നിങ്ങളുടെ ക്ലൗഡ് സ്റ്റോറേജ് ഉള്ളടക്കങ്ങൾ ഷോർട്ട് യുആർഎൽ സേവനം ഉപയോഗിച്ച് ഷെയർ ചെയ്യാതിരിക്കുക എന്നതാണ് വ്യക്തിപരമായ വിവരങ്ങൾ നഷ്ടപ്പെടാതിരിക്കാനുള്ള മാർഗം. അതോടൊപ്പം ഇനി മുതൽ നിങ്ങൾക്ക് ഏതെങ്കിലും ഒരു ഷോർട്ട് യുആർഎൽ ലഭിക്കുമ്പോൾ ചിന്തിക്കുക; അതൊരു ഹാക്കർ നിങ്ങളിലേക്ക് നീട്ടുന്ന ചൂണ്ടയാകാം.
Source:manoramaonline
0 comments:
Post a Comment